Балықшы тұйғын (лат. Pandion haliaetus) - сұңқартәрізділер отрядының тұйғындар тұқымдасына жататын жыртқыш құс.

Арқасы қарақоңыр, бауыры ақ, жемсауы қоңыр, теңбіл түсті. Басы ақшыл сары, табанында балық ұстауға икемді тікенек балықшытәрізді бүртіктері бар. Балапандарының мамығы көгілдір.

Балықшы тұйғын жойылып кету жағдайында тұрған түр. Ертеректе Қазақстанның балығы мол және ұя салуға ағаштары бар көптеген су қоймаларында мекендеген.

Наурыздың аяғы - сәуірде ұшып келеді. Сәуірдің аяғы - мамырдың басында жұмыртқа салады. Балапандары ұяда 49 - 60 тәулік болады. Қайтуы тамыздың үшінші онкүндігінен қазанның 20 - на дейін созылады. Негізінен балықпен қоректенеді.